العواف عليكم ورحمه الله وبركاته يابا الحاج ابو الهول ازيك كيديه وازاي حالاتك....
لا ولا مؤاخذه اني مش جاي اطمن علي حالاتك النهارديه اني جاي استفهم منك ايه الموضوع
امال ايه مش الحكومه كلاتها صحابك يبجي لازوما عارف الفوله كلاتها هو فيه حاجه بتخفي عليك ….. لما البيه سامح فهمي وزير البترول طلع ف التلافزيون وهو بيتبسم وجال ….. مصر طلعت دهب من الجبل يارجاله....
ايويه وكتاب الله جال كيديه وهو بيتبسم والناس كلاتها شافته وهو بيتبسم
قوم ايه يابا الحاج ابو الهول الناس كلاتها راحت شاريه تصويره للبيه وزير البترول وعلقتها ف اوده الجلوس وجعدوا كلاتهم تحت التصويره يتبسموا …
والكلام داير ف البلد كلاتها ان الحكومه حا تدي كل نفر كيلو دهب يفك روحه بيه …. امال ايه يابا الحاج ابو الهول مش الناس ديه كلاتها ولاد الحكومه وكلاتهم بيبتسموا كمان...
والا الناس دي كلاتها ولاد حرام يعني ده الناس كلاتها اتبرت من اهاليها وكل نفر نايم علي صرصور ودنه وبيجول اني ابن الحكومه اني ابن الحكومه اني امي الحكومه...
لا وايه ناس يامه راحوا عالحيزب يعملوا عضويه ف الحيزب اصل الكلام اللي داير ف البلد ان الحكومه حاتوزع الدهب الاول علي ولاد الحيزب وبعدين حاتوزع علي ولاد ال.........
بس يابا الحاج ابو الهول الشيخ النجرتي جال للناس يابهايم هي ولا مؤاخذه الحدايه بتحدف كتاكيت.... حيلويه الحدايه ديه
قوم ايه يابا الحاج ابو الهول الناس كلاتها شتموه وجالوله عيب عليك تبجي راجل شايب وعايب الحكومه مش حدايه .. الحكومه حمامه..... لا … من اللي بتطير ام جناحين .......
قوم ايه الشيخ النجرتي جايل الحكومه باعت الجبل بتاع الدهب ديه من زمان ودلوقتي الدهب ديه بتاع ناس مش بتاع الحكومه افهموا يا بشر قامت الناس جايله طب البيه وزير البترول اتبسم ليه ف التلافزيون ؟؟؟
طب يابا الحاج ابو الهول الناس تسدق مين يعني تسدق البيه وزير البترول وهو بيتبسم والا تسدق الشيخ النجرتي اللي عمره ما اتبسم...
يعني بالعربي كيديه ومن الاخر الدهب ديه كلاته اللي ف الجبل بتاع مين ….. بتاع ناس والا بتاعنا كلاتنا
استر عالدهب يارب
مجدي المصري
ليست هناك تعليقات:
إرسال تعليق