السلامو عليكو يابا الحاج ابو الهول.... ازيك كيديه وازاي صحتك اني سمعت انك بعافيه حبتين قمت اني خاطف رجلي وجايلك علي طول....سلامتك يابا الحاج ابو الهول الف سلامه ليك ..مال وشك مخطوف ليه كيديه .. اوعي تكون زعلان ويا الحكومه لا سمح الله والا حاجه .. سلامتك انشالا العدوين كلاتهم ونت لا
مسهم ليه بس كيديه ما تفك نفسك .. الدنيا مش مستاهله .. اجولك اني حاضحكك شويه ايوه اضحك ماحدش واخد منها حاجه ...
اصل من كام يوم كيديه الاستاذ براهيم افندي كان نازل البلد يزور جماعته اصل براهيم افندي ديه بيشتغل ف الحكومه ف مصر وكل فين لما بييجي البلد يزور جماعته … قوم ايه يابا الحاج ابو الهول كلاتنا بنروح نسهر حداهم وهو بيحكيلنا الحكومه عامله ايه .. امال ايه مش ابن الحكومه اكيد عارف كل حاجه
المهم عشان ماطويلشي عليك براهيم افندي ديه قال ان الحكومه قررت ف الاجتماع الاخير انها تشتغل بالشفافيه والطهاره والمصارحه والمجاهره وكلام كبير من ديوان كتير
وكان جاعد ويانه الشيخ نجرتي .. قام الشيخ نجرتي ديه منفوض زي مايكون جاله لطف والعياز بالله وجال ايه قله الحيا ديه وخد بعضه ومشي
المهم عشان ماطولشي عليك تاني يوم كلاتنا رحنا للشيخ نجرتي ف داره نعرف ايه الموضوع اصل كلاتنا كيديه ولامؤاخذه ما نعرفشي الالف من كوز الدره يبقي حانعرف الكلام الكبير ديه كلاته والا ايه الحورمانيه اللي فيه منين؟
قام الشيخ نجارتي قايلينا ولا مؤاخذه كيديه ان الشفافيه ديه ولا مؤاخذه حاجه زي الهدوم الشفافه ولا مؤاخذه كيديه ما تسترشي اللي تحتيهه طب ينفع يابا الحاج ابو الهول ان الحكومه تلبس ولا مؤاخذه الشفافيه ديه وكل حاجه تبان؟؟؟؟
كلام بصحيح .. دي قله حيا والنبي الحكومه لو عملتها بوليس الاداب يافشها علي طول وتبقي فضيحتها بجلاجل... قمنا كلاتنا وروحنا شدين تلغراف للحكومه وقلنا بلاش الشفافيه الحكايه مش ناقصه فضايح … اشتغلوا بالستره ربنا يستر عليكم وعالمسلمين كلاتهم
وبعدين رجعنا تاني للشيخ نجارتي ديه راح قايل لينه كمان الطهاره .. الطهاره يابشر كلاتكم مش عارفين الطهاره …. قمنا كلاتنا قايلين ف حنك واحد الحمد لله كلاتنا ”.....” واحنا صغيرين
قام الشيخ النجرتي جايل الحكومه ساكته علي نفسيها العمر ديه كلاته ازاي ؟؟ طب ازاي الحكومه بعد السن ديه كلاته " …." يادي الكسوف ياولاد يصوح الكلام ديه
وبعدين لما الحكومات التانيه تعرف ان الحكومه بتاعتنه ولا مؤاخذه ربنا كرمها و "…..." حاتيجي تزور الحكومه بتاعتنا يبجي حتما ولابد ولازوما نعمل ليله للحكومه … والا الناس تيجي وتنقط الحكومه وتروح من غير ماتاكل ولاتشرب
المهم عشان ماطولشي عليك يابا الحاج ابو الهول الشيخ النجرتي اول ما جال وبعدين المصارحه كلاتنا قلنا كفايه الله يخرب بيتك حاتودينا كلاتنا ف داهيه
استر علينا كلاتنا يارب
مجدي المصري
ليست هناك تعليقات:
إرسال تعليق