العواف عليك يابا الحاج ابو الهول.. اصل اني جايلك ولا مؤاخذه النهارده علي حكايه كيديه حوصلت حدانا ف البلد...
اصل امبارح الصبح بدري والناس كلاتها رايحه ولا مؤاخذه تشوف اشغالها جت ولا مؤاخذه عربيه المرور ووقفت ف اول البلد وعملت ولا مؤاخذه "كمين باللادار" لا مش الدار بتاعنا اللادار ديه ولا مؤاخذه حاجه كيديه بتاخد "الاطر" بتاع العربيات اللي بتجري بسرعه .. يقوم البيه ظابط المرور ولا مؤاخذه كيديه يوقفهم ويكععهم دم قلبهم مخالفات ...فلوس ياما واهو كله رزق ورايح للحكومه
وان جيت للحق يابا الحاج ابو الهول الرزق يحب الخفيه ورزق البدريه ديه كله مخالفات مرور
قمت اني وشويه ناس من اللي كانوا ماشيين رايحين اشغالهم سيبنا اشغالنا وقعدنا جمب الاسفلت ولا مؤاخذه نتفرج
وان جيت للحق يابا الحاج ابو الهول البيه ظابط المرور ديه كان مرزق من اول ما نصب الكمين بتاعه ديه واللادار عمال يلطع ف اطر العربيات والبيه الظابط والبهوات امناء الشرطه يوقفوا العربيات ويكععوا صحابها مخالفات ياما واني والناس اللي قاعدين ويايا كل ما نشوف اللادار بيلدع واحد نقول الله واكبر الطع خلي العالم تتعلم الادب .. الطع
قام البيه الظابط خد باله مننا قام باصص لينا شزرا اي والنبي شزرا وقال قاعد تعمل ايه حداك ياجدع انت وهو …. قمت اني قايله احنا قاعدين مستنيين القطر
راح البيه الظابط متعفرط وقالي انت حاتهزر ياروح امك... حيلويه روح امك دي
قمت اني قايله ياباشه احنا ولا مؤاخذه انفار بنشتغل ف الغيط والمقاول بتاع الانفار بتاعنا اسمه القطر ...اصل اني مفتح وفاهم اسلك ازاي ويا البهوات الظباط دولم ...قام اللادار راح لاطع عربيه ..قام البيه الظابط اتلفت وانشغل عنا وراح يوقف العربيه اللي لطعها اللادار
المهم يابا الحاج ابو الهول العربيه دهيا كان ازازها كلاته اسود ف اسود والعياز بالله وديه ممنوع ف قانون المرور … المهم البيه صاحب العربيه فتح الازاز وقال للبيه الظابط "مستسار" راح البيه الظابط ضاربله تعظيم سلام
قمنا احنا كلاتنا اشرابينا نبص علي نمر العربيه الملاكي لقينا مكتوب عليها هيئه قضائيه وبعدين تحت منها ملاكي قريش وبعدين الارقام قمنا احنا قلنا بينتنا وبين بعض الباشا ديه مستسار في محكمه قريش
المهم يابا الحاج ابو الهول اللادار لطع واحد تاني واتاريه طلع برضك بيه كبير ظابط بوليس ولما اشرابينا نبص علي النمر لقينا مكتوب عليها ملاكي بني خزاعه بس من غير ارقام ….قمنا احنا قلنا الباشا ديه مامور اسم اول بني خزاعه …... وكمان واحد بيه كبير طلع ظابط جيش بس ديه بقي ماكانش حاطط نمر من اساسه
قمنا احنا قلنا البيه ديه ظابط ف الجيش السري …..... المهم يابا الحاج ابو الهول مش حاطول عليك احنا كلاتنا فهمنا كيديه من غير مفهوميه ان الكبير كبير ف البلد دي وان البهاوات المستسارين وظباط البوليس وظباط الجيش دولم كبارات البلد
وان قانون المرور الجديد البريفيكس دوان مش بيتطبق عليهم امال ايه ماهومن برضك بهوات كبار ومش جرابيع ولا مؤاخذه زي حالاتنا ينضربم بالمراكيب ويدفعوا مخالفات ياما تهري كبد اللي خلفوهم...... بس اللي حازز في نفس العالم كلاتها ان لما الحكايه كيديه طب ما عملوش قانون مرور خصوصي ليهم وبرضك يكون بريفيكس وسابولنا احنا الجرابيع القانون بتاعنا ليه والا هيه العمليه اشتراكيه وخلاص ...ديه دي يابا الحاج ابو الهول ما يعملوا قانون مرور للبهوات الكبار وقانون مرور للجرابيع وكل واحد والقانون بتاعه
استر عالجرابيع يارب
ليست هناك تعليقات:
إرسال تعليق