السلامو عليكو يابا الحاج أبو الهول …. أني فرحان فرحان قوي النهارده أصل البيه رئيس الوزرا كان حدانا في البلد امبارح ...لا مش فرحان بالبيه رئيس الوزرا … أني فرحان باللي حوصل في البلد
أصل يابا الحاج من كام يوم كيده والبلد كلاتها مقلوبه رأسا علي نقب والناس مش عارفه السبب … البيه المأمور والبهوات الظباط كلاتهم والبهوات المخبرين كلاتهم دايرين في البلد ليل نهار يأفشوا في الطفاطف والعيال الحراميه والعيال المشبوهه حتي الواد حسانين الجعر بتاع المخدرات أفشوه ..ان جيت للحق يابا الحاج أبو الهول ساعه ما أفشوه ماكانش معاه مخدرات .. مش مهم المهم هما يأفشوه والحشيش من حداهم أمال ايه الناس لبعضيهم ...حتي الغرزه اللي ف أول البلد بتاعه الواد الجربوع أفشوا الجماعه المساطيل اللي جواها وكسروهاله
لا والاحلي ان البيه رئيس المدينه زات نفسه والرجاله بتوعه كلاتهم دايرين في الشوارع ليل ونهار ينضفوا ويكنسوا ويشيلوا الزباله ويدهنوا لرصفه ويشيلوا الاشغالات ولامؤاخذه أي وليه فارشه بشويه لمون يضربوها ويمشوها ...لحد ما البلد بقت بريفكس أي والنبي بريفكس
ده حتي البيه رئيس المدينه جاب جركن شامبو م المفتخر أبو ريحه واداه للعمال يغسلوا بيه الشوارع علشان ريحتها تبقي حيلوه ..قام العمال خادوه واستحموا بيه ف النافوره وبقت ريحتهم حيلوه
المهم مش حاطول عليك احنا عرفنا كيده من مصدر موثوق بيه ان السبب في ديه كلاته ان البيه رئيس الوزرا جاي حدانا البلد يفتتح الترعه العمومي أصلها كانت مقفوله أيام السده الشتويه والفلاحين ماكانوش لاقيين ميه يسقوا بيها الفول والغله
المهم مش حاطول عليك .. لما البيه رئيس الوزرا جه حدانا في البلد الناس المهابيل جريت في الشارع فاكرين ان البيه رئيس الوزرا جاي يفرق اطعام للمساكين كفاره للايمانات اللي داير يحلفها عالعمال والبطال للشعب
وكل واحد من الناس المهابيل شايل في ايده ماعون كبير ياخد فيه الاطعام ولامؤاخذه ...ولما البيه رئيس الوزرا فات في البلد كان قافل ازاز العربيه يعني بالصريح كده مارماش ولا رغيف للشعب
قامت الناس اتكسفت علي دمها وروحت وهي بتطبرطم وتقول يمكن البيه رئيس الوزرا أطعم ناس تانيه نستني اليمين الجاي وخلاص
المهم مش حاطول عليك يابا الحاج أبو الهول .. والناس الأكابر كلاتها واقفه عند فم الترعه كان واقف في وسطيهم الاستاذ وطني بتاع الحيزب اللي في البلد وكان لابس الحته السكروته اللي حيلته وحاطت ولا مؤاخذه جيل علي شعره وأول ماشاف البيه رئيس الوزا هالل من بعيد .. مسكته النداهه وقعد يهتف ويقول بالروح بالدم نفديكي ياتيرعه .. بالروح بالدم نفديكي ياتيرعه والناس تسكت فيه وهو لايمكن ابدا لحد ما اغمن عليه كالميت قام العمال بتوع مجلس المدينه شالوه وحطوه جمب الحيط أصل ماحدش كان فاضيله
المهم يابا الحاج أبو الهول مش حااطول عليك احنا كنا قاعدين ويا الشيخ سماعين … لا مش بتاع الاوقاف ..الشيخ سماعين ديه بتاع ربنا والناس سالته عن أيمانات البيه رئيس الوزرا ديه
قام الشيخ سماعين قال ان البيه رئيس الوزرا يحق له تلات ايمانات بس بعد كيده الوزاره تتحرم عليه ولا يمكن يرجع ليها تاني الا لو جاب ولا مؤاخذه كيده محلل .. الشرع بيقول كيده وكمان لايجوز كفاره عن أيمانات رئيس الوزرا
طب يابا الحاج ابو الهول الناس تجيب محلل للوزاره منين بس
أستر علي الوزاره يارب
ليست هناك تعليقات:
إرسال تعليق