العواف عليكم يابا الحاج ابو الهول … ازيك كيديه.
اصل اني جايلك النهارديه خصوصي اجعد وياك اتحدت ونتسامر حبتين وجايبلك زواره فضلت خيرك شويه اشطه وشويه مش م اللي بيقطع النفس …. ايويه من ابو دوده وكمان رغيفين فلاحي مرحرحين اصل اني شايفك كيديه ممؤوت علاوله...
الا جوللي يابا الحاج ابو الهول هيه ولا مؤاخده الحكومه حاتروح المصيف امته؟
اني سامع ان الحكومه بتروح المصيف بعد السانويه العامه امال ايه اصل البهاوات الوزرا كل نفر منهم حداه عيل والا اتنين ف السانويه العامه والمدرسين يامه داخلين خارجين حداه ف الدار بيدوا المحروس ابنه دروس والبيه الوزير جاعد جمب المحروس ابنه بيزاكرله....
اللهم نجح المحاريس كلاتهم … امين
اللهم شتت لمتحانات وشتت لاسئله وكمان اللي بيحطوا الاسئله …. امين
دول بالزات اللهم فرق جمعهم … امين
اللهم اجعل السانويه العامه ديان بردا وسلام عالمصريين كلاتهم همن والمحاريس ولادهم والمحاريس ولاد الوزرا ….امين
اللهم نجح المحاريس كلاتهم اللي اتخرب بيوت اهاليهم ع الدروس الخصوصيه والسنترات...امين
اللهم اخرب بيت ال......
حاضر ح سكت يابا الحاج ابو الهول .. ايويه احنا مش جاعدين جمب باب الجامع....
بس والنبي تجوللي يابا الحاج ابو الهول علي معاد سفر البهاوات الوزرا مرينه اصل اني نفسي اروح اشوف مرينه ديان اللي البهوات الوزرا بيروحوها نفسي حد م البهوات الوزرا ياخدني وياه مرينه واني مستعد اركب ف عربيه الشنط بتاعه البيه الوزير...
وعلي فكريه اني محضر الشنطه بتاعتي ف البلد وفيها كلاتها حاجه حتي اللباس …. لا يابا الحاج ابو الهول … لباااااااس البحر .. لا …
كمان شرعي يابا الحاج ابو الهول الشيخ النجارتي شافه و جاللي شرعي بس المهم اغض البصر قمت اني واخد ويايا ف الشنطه كمامه اغض بيها البصر والحنك كمان امال ايه الدين بيجول كيديه …. اصل اللي زي حالاتي لازم يغض البصر والحنك عشان ما يعضش امال ايه العالم ممكن تتسعر....
بس اني خايف يابا الحاج ابو الهول الكمامه تروح مني ف البحر …..
الا قوللي يابا الحاج ابو الهول .. النفر اللي تضيع منه الكمامه ف البحر .. الشرع بيطلب منه كفاره ع اللي يشوفه ف البحر.؟
استر ع البحر يارب
مجدي المصري
ليست هناك تعليقات:
إرسال تعليق